रोल्पाको परिवर्तन गाउँपालिका–३ बागमारा क्षेत्रमा दुई वटा सकेट बम फेला परेका छन्। पाछावाङ खोलामा जाली लगाउनका लागि खन्ने क्रममा मंगलबार बिहान मजदुरहरूले शंकास्पद वस्तु देखेपछि सुरक्षाकर्मीलाई जानकारी गराएका थिए।

सूचना पाएपछि सूर्यदल गण लिबाङको बम डिस्पोजल टोली घटनास्थल पुगेको थियो। टोलीका प्रमुख सेनानी ईश्वर थापाका अनुसार प्रारम्भिक जाँचका क्रममा फेला परेका वस्तु सकेट बम भएको पुष्टि भएको हो।

उनका अनुसार दुवै बमलाई सुरक्षित रूपमा नियन्त्रणमा लिइसकिएको छ। घटनास्थललाई समेत सुरक्षा निगरानीमा राखिएको बताइएको छ।

सुरक्षा निकायले ती बम तत्कालीन माओवादी युद्धकालमा राखिएको हुनसक्ने अनुमान गरेको छ। घटनाबारे थप अनुसन्धान भइरहेको जनाइएको छ।