आकर्षक वैदेशिक रोजगारीको लोभ देखाएर ठगी गर्ने दुई जना पक्राउ

काठमाडौं । वैदेशिक रोजगारीका नाममा सर्वसाधारणलाई आकर्षक तलबको प्रलोभन देखाई रकम असुलेर सम्पर्कविहीन भएका दुई जनालाई प्रहरीले पक्राउ गरेको छ।

पक्राउ पर्नेमा गोकर्णेश्वर नगरपालिका–७ मा बसोबास गर्दै आएका बारा निजगढ नगरपालिका–१३ का ४९ वर्षीय सुरेश गिरी र ललितपुर महालक्ष्मी नगरपालिका–१ निवासी संखुवासभा चैनपुर नगरपालिका–३ का ७० वर्षीय वीरबहादुर श्रेष्ठ रहेका छन्।

प्रहरीका अनुसार सुरेश गिरीले एक जना पीडितलाई टर्कीमा रोजगारीको व्यवस्था गरिदिने आश्वासन दिँदै १ लाख ९० हजार रुपैयाँ लिएका थिए। त्यस्तै, वीरबहादुर श्रेष्ठले बेलायत पठाइदिने भन्दै अर्का एक पीडितबाट २ लाख रुपैयाँ उठाएका थिए। रकम लिएपछि दुवै जना सम्पर्कविहीन भएको भन्दै पीडितहरूले उजुरी दिएका थिए।

उजुरीपछि काठमाडौं उपत्यका अपराध अनुसन्धान कार्यालय, टेकुको टोलीले अनुसन्धान अघि बढाएको थियो। सो क्रममा सुरेशलाई काठमाडौं महानगरपालिका–१२ बाट तथा वीरबहादुरलाई ललितपुर महालक्ष्मी नगरपालिका–१ बाट पक्राउ गरिएको प्रहरीले जनाएको छ।

पक्राउ परेका दुवै जनालाई थप अनुसन्धान र कानुनी कारबाहीका लागि वैदेशिक रोजगार विभाग, ताहाचल पठाइएको छ।

एक्सप्रेस

सम्बन्धित खबर

बेलायतमा नेपाली विद्यार्थी सुतेकै अवस्थामा मृत फेला

काठमाण्डौँ । लन्डनमा एक नेपाली विद्यार्थीको मृत्यु भएको छ । सल्यानको भल्चौर ७ का योमन चन्दको मंगलबार बिहान ९ः३० बजे लन्डन एजवेयरमा निधन भएको हो । एक वर्षअघिमात्र अध्ययनका लागि बेलायत आएका योमनको सुतेकै अवस्थामा ज्यान गएको उनीसँगै बस्ने मनोज कुँवरल...