कक्षा १२ नतिजामा त्रुटि भएको भन्दै अनेरास्ववियुद्वारा राष्ट्रिय परीक्षा बोर्ड अगाडि प्रदर्शन

भक्तपुर — कक्षा १२ को नतिजा प्रकाशन तथा मूल्याङ्कन प्रक्रियामा त्रुटि भएको आरोप लगाउँदै अनेरास्ववियुले छानबिनको माग गर्दै भक्तपुरस्थित राष्ट्रिय परीक्षा बोर्ड अगाडि प्रदर्शन गरेको छ।

शुक्रबार भएको प्रदर्शनमा अनेरास्ववियुले नतिजा प्रकाशन र मूल्याङ्कन प्रक्रियामा कमजोरी देखिएको तथा पुनर्मूल्याङ्कन र रिटोटलिङका लागि प्रभावकारी व्यवस्था नभएको भन्दै असन्तुष्टि जनाएको हो।

प्रदर्शनका क्रममा विद्यार्थीहरूले ‘विद्यार्थीमाथि अन्याय बन्द गर’, ‘शिक्षामा बेतिथी अन्त्य गर’, ‘अनियमितता छानबिन गर’, ‘दोषीलाई कारबाही गर’, ‘शैक्षिक न्याय कायम गर’ लगायतका नारा लेखिएका प्लेकार्डहरू प्रदर्शन गरेका थिए।

अनेरास्ववियुकी महासचिव अञ्जना शिवाकोटीले शिक्षा क्षेत्रमा सुधारको माग गर्दै परीक्षा बोर्डमा प्रदर्शन गरिएको बताइन्। उनले नतिजा प्रकाशनमा भएको त्रुटिका कारण विद्यार्थीहरूको भविष्यमा असर परेको भन्दै सरकारलाई गम्भीर हुन आग्रह गरिन्।

यसैबीच, विद्यार्थीहरूले छिटो नतिजा सार्वजनिक गर्ने नाममा त्रुटि गर्ने कर्मचारीमाथि कारबाही गर्नुपर्ने माग पनि अघि सारेका छन्।

एक्सप्रेस

सम्बन्धित खबर