राष्ट्रिय स्वतन्त्र पार्टी (रास्वपा) म्याग्दीले जिल्लाका ६ स्थानीय तहमध्ये तीन वटा पालिकामा नयाँ नेतृत्व चयन गरेको छ। जिल्ला उपसभापति छवी आचार्यका अनुसार बेनी नगरपालिका, रघुगङ्गा गाउँपालिका र मङ्गला गाउँपालिकामा पालिका स्तरीय नेतृत्व टुंगो लागेको हो।

जिल्लाका ४५ वडामध्ये हालसम्म २५ वडामा वडा अधिवेशन सम्पन्न भई नयाँ नेतृत्व चयन भइसकेको पनि उनले जानकारी दिए।

बेनी नगरपालिकाको प्रथम नगर अधिवेशनबाट सभापतिमा राजबहादुर केसी चयन भएका छन्। उपसभापतिमा यादव सुवेदी, सचिवमा काशिराम घिमिरे र सहसचिवमा जमुना केसी चयन भएका छन्। कुल ९ सदस्यीय कार्यसमिति गठन गरिएको छ। अन्य पदहरू सर्वसम्मत भए पनि सभापति पदमा सहमति नजुटेपछि मतदानमार्फत निर्णय गरिएको उपसभापति आचार्यले बताए।

यस्तै, रघुगङ्गा गाउँपालिकाको प्रथम अधिवेशनबाट सभापतिमा डम्मरबहादुर पाण्डे चयन भएका छन्। उपसभापतिमा प्रकाश पाईजा, सचिवमा दलबहादुर कार्की र सहसचिवमा इमाकुमारी शाही रकाल चयन भएका छन्। सो पालिकामा पनि ९ सदस्यीय कार्यसमिति सर्वसम्मत रूपमा गठन गरिएको छ।

मङ्गला गाउँपालिकामा सभापतिमा प्रतिक सुवेदी, उपसभापतिमा मनबहादुर छन्त्याल, सचिवमा हरी आचार्य र सहसचिवमा भिमकली सुनार चयन भएका छन्। अधिवेशनमार्फत जिल्लाबाट ३ जना जिल्ला अधिवेशन प्रतिनिधि, १ जना प्रदेश अधिवेशन प्रतिनिधि र १ जना केन्द्रीय महाधिवेशन प्रतिनिधि पनि चयन गरिएको पार्टीले जनाएको छ।

अधिवेशन सम्पन्न नभएका अन्नपूर्ण, धवलागिरी र मालिका गाउँपालिकामा जिल्ला अधिवेशनपछि पालिका अधिवेशन गरिने बताइएको छ।

आगामी जेठ २३ गते शनिबार प्रथम जिल्ला अधिवेशन हुने रास्वपाले जनाएको छ। साथै, पार्टीले असार ७, ८ र ९ गते चितवनमा प्रथम केन्द्रीय महाधिवेशन गर्ने तयारी गरिरहेको छ।