काठमाडौं महानगरपालिका–३२ नरेफाँटमा एक युवामाथि धारिलो हतियार प्रयोग गरी आक्रमण गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा धनुषा घर भई हाल ललितपुरको टिकाथली बस्दै आएका २८ वर्षीय धनराज यादव रहेका छन् ।

जिल्ला प्रहरी परिसर काठमाडौंका अनुसार सिरहाको कर्जन्हा नगरपालिका–१० घर भई हाल नरेफाँट बस्दै आएका १८ वर्षीय करणकुमार साहमाथि शुक्रबार दिउँसो करिब २ बजे आक्रमण भएको थियो । घटनामा साहको हात, ढाड, घाँटी र टाउकोमा चोट लागेको बताइएको छ ।

घाइते साहले आफूमाथि ज्यान मार्ने उद्देश्यसहित आक्रमण गरिएको भन्दै प्रहरी वृत्त नयाँ बानेश्वरमा उजुरी दिएका थिए । उजुरीपछि प्रहरीले अनुसन्धान अघि बढाउँदै धनराज यादवलाई पक्राउ गरेको हो ।

प्रहरीका अनुसार घटनामा यादवसँगै अन्य ५/६ जना पनि संलग्न रहेको आशंकामा खोजी भइरहेको छ ।

प्रारम्भिक अनुसन्धानमा आक्रमणमा संलग्न र पीडितबीच मामा–भान्जाको सम्बन्ध रहेको खुलेको छ । प्रहरी स्रोतका अनुसार यसअघि टिकाथली क्षेत्रमा भएको विवादमा भान्जाले मामामाथि आक्रमण गरेको आरोप छ । सोही घटनाको प्रतिशोधस्वरूप पछिल्लो आक्रमण भएको हुनसक्ने प्रहरीको अनुमान छ ।