काठमाडौं ।  नेपाल बार एसोसिएसनले सर्वोच्च अदालत प्रशासनले रिट तथा निवेदन दर्ता गर्न अस्वीकार गरेको भन्दै विरोध कार्यक्रम घोषणा गरेको छ । बारले न्याय, विवेक र स्वच्छ प्रक्रियाको पक्षमा आज दिउँसै लालटिन बालेर प्रदर्शन गर्ने निर्णय गरेको हो ।
‎
‎सोमबार कामु प्रधानन्यायाधीश सपना मल्ल प्रधान सँग भेटघाटपछि बसेको बारको बैठकले सर्वोच्च अदालत प्रशासनबाट “अनपेक्षित गतिविधि र हर्कत” भएको निष्कर्ष निकालेको जनाएको छ ।
‎
‎बारका महासचिव केदार कोइराला का अनुसार बार परिसरमा कानुन व्यवसायीहरूको उपस्थितिमा न्यायिक प्रक्रिया पारदर्शी बनाउन दबाबस्वरूप विरोध कार्यक्रम गर्न लागिएको हो ।
‎
‎बारले सर्वोच्च अदालतमा दर्ताका लागि पुगेका रिट निवेदनहरू प्रशासनबाटै दरपीठ गरी फिर्ता पठाइएकाले न्याय प्राप्तिको मार्ग अवरुद्ध भएको ठहर गरेको छ । संविधान, न्याय प्रशासन ऐन र सर्वोच्च अदालत नियमावलीअनुसार कामु प्रधानन्यायाधीशबाट दर्ता गर्न आदेश दिइएको निवेदनसमेत प्रशासनले कार्यान्वयन नगरेको जानकारी आएको बारको भनाइ छ ।
‎
‎यस्तै, प्रतिनिधिसभामा अदालतमा विचाराधीन विषयलाई लिएर केही सांसदहरूले दिएको अभिव्यक्तिप्रति पनि बारले गम्भीर ध्यानाकर्षण भएको जनाएको छ । बारले संविधानको धारा १०५ अनुसार विचाराधीन विषयमा संसदमा छलफल गर्न बन्देज रहेकाले त्यसको पालना हुनुपर्ने उल्लेख गरेको छ ।
‎
‎बारले जेठ ५ गते दिउँसो १:१५ बजे नेपाल बार परिसरमा लालटिन बालेर विरोध प्रदर्शन गरिने जनाएको छ । साथै प्रशासनको व्यवहारलाई “असाधारण र अप्राकृतिक” भन्दै यस्तो गतिविधि न्याय प्रणालीका लागि ऐतिहासिक भूलका रूपमा अभिलेखित हुने चेतावनी दिएको छ ।
‎
‎साथै, संसदमा आएका विवादास्पद अभिव्यक्तिहरू संसदीय अभिलेखबाट हटाउन सभामुख डोलप्रसाद अर्याल को ध्यानाकर्षण गराइएको पनि बारले जनाएको छ ।