काठमाडौं । राष्ट्रिय स्वतन्त्र पार्टी (रास्वपा)को प्रथम महाधिवेशनअन्तर्गत केन्द्रीय सदस्य चयनका लागि भएको मतदान सम्पन्न भएको छ। निर्वाचन समितिका अनुसार अबको करिब दुई घण्टाभित्र मतगणनाको नतिजा सार्वजनिक गरिने तयारी गरिएको छ।

९९ सदस्यीय केन्द्रीय समितिको चयनका लागि पहिलो चरणको निर्वाचनमा कुल ३७९ जना उम्मेदवार चुनावी प्रतिस्पर्धामा उत्रिएका छन्। तीमध्ये २१० जनाले खुला कोटाबाट उम्मेदवारी दिएका छन् भने १७४ जनाले भूगोलतर्फबाट प्रतिस्पर्धा गरिरहेका छन्।

भूगोलतर्फ सातै प्रदेशबाट समान रूपमा पाँच–पाँच जना केन्द्रीय सदस्य निर्वाचित हुने व्यवस्था गरिएको छ। यसअनुसार प्रदेशतर्फ ३५ जना चयन हुनेछन्। खुलातर्फ भने ६४ पदका लागि २१० उम्मेदवारबीच प्रतिस्पर्धा भएको छ।

प्रदेशगत उम्मेदवारी हेर्दा सुदूरपश्चिममा १८, मधेसमा २०, कोशीमा २०, वाग्मतीमा २७, गण्डकीमा २७, लुम्बिनीमा ३१ तथा कर्णालीमा ३१ जनाले उम्मेदवारी दिएका छन्।

केन्द्रीय सदस्यहरूको अन्तिम मतपरिणाम सार्वजनिक भएसँगै पार्टी पदाधिकारी चयनका लागि दोस्रो चरणको निर्वाचन कार्यतालिका घोषणा गर्ने तयारी गरिएको निर्वाचन समितिले जनाएको छ।