अमेरिकी सेनाले होर्मुज जलमार्ग क्षेत्रमा इरानका दुई ड्रोन खसालिएको जनाएको छ। अन्तर्राष्ट्रिय समुद्री यातायातका लागि जोखिम उत्पन्न गरिरहेको भन्दै ती ड्रोनहरूलाई निष्क्रिय पारिएको सीएनएनले उल्लेख गरेको छ।

अमेरिकी सेन्ट्रल कमान्डले सामाजिक सञ्जाल ‘एक्स’ (पूर्व ट्विटर) मा जानकारी दिँदै भनेको छ कि मध्यपूर्वमा तैनाथ अमेरिकी सेनाले हालै होर्मुज जलमार्गमा अन्तर्राष्ट्रिय समुद्री आवागमनमा खतरा बनेका दुई ‘वान–वे अट्याक ड्रोन’ नष्ट गरेको हो।

कमाण्डले आफ्नो पोस्टमा इरानबाट हुने सम्भावित आक्रामक गतिविधिको जवाफमा रक्षात्मक कदम निरन्तर जारी रहने र आवश्यक परे थप कारबाहीका लागि पनि आफूहरू तयार रहेको स्पष्ट पारेको छ।

यसअघि पनि शुक्रबारका दिन अमेरिकी सेनाले इरानका चार ड्रोन खसालेको विवरण सार्वजनिक गरिएको थियो।