अमेरिका र इरानबीच सम्झौताको प्रयास तीव्र भइरहेका बेला पाकिस्तानका प्रधानमन्त्री शहबाज शरीफ र सेनाप्रमुख जनरल असीम मुनीर उच्चस्तरीय भेटवार्ताका लागि चीन पुगेका छन्।

वासिङ्टन र तेहरानबीच मध्यस्थता गराउन जनरल मुनीरले महत्वपूर्ण कूटनीतिक भूमिका निभाइरहेको विश्लेषण गरिएको छ। यसै सिलसिलामा, मध्यपूर्वमा बढ्दो तनाव (विशेषगरी अमेरिका र इजरायलसँग जोडिएको) न्यूनीकरण गर्न र सम्भावित युद्ध टार्ने उद्देश्यले गत साता मात्रै उनले गृहमन्त्री मोहसिन नकवीसँगै इरानको भ्रमण गरेका थिए।

यही भूराजनीतिक पृष्ठभूमिबीच, चीनले पनि मध्यपूर्वमा शीघ्र शान्ति र स्थिरता कायम गर्न पाकिस्तानसँगको सहकार्यमा प्रभावकारी तथा सकारात्मक भूमिका निर्वाह गर्ने प्रतिबद्धता जनाएको छ।